Es git Lüt, die sin organisiert. Es git lüt die sins nid. Und denn gits die wo am 10i zobe erfahre, dass si am 6i am Morge vom Folgetag müen packt ha, usgschlofe uf de Matte stoh sötte, es Auto organisiert ha und fahre müen.
– JO BL
Natürlich het das alles klappt und mir sin richtig Suste gfahre. De einti oder anderi Läser wird jetzt sage: Mega lame, immer de glichi Bricht, Schribstil, Wortwahl & Themene. Aber e Weisheit beseit, wo kei Grund isch zum öppis z ändere, isch es e Grund zum bihphalte. Und ganz näbebi sins au wider die Ähnliche Lüt gsi. Mir hän de Jan (mir hän en vermisst) wo de Kurs gleited het, de Leonidas, de Bebbi, de Nemo, de Ultralight-Niels, de Gurti (wie gehabt, immerno im Dienst) und de Gabi.
Wie gseit, mir sin bis zur Steinalp gfahre. Unseri Fahrzügflotte isch so guet, dass me mega niedertourig fahre chan (nei, s ligt nid drah dass de Fahrer schaltfuul isch). Uf alli Fäll hämmer s gaudi kah. Denn isch d Frog ufcho, warum mir nid mit de Ski unterwägs sin. Näbe dem, dass mir susch d Usbildig in de Skieschue hätte müesse mache, het de Jan scho immer s Bedürfnis kah go Schneeschuelaufe. Er het sogar äxtra es Youtubevideo gluegt zur Vorbereitig. Zerst hämmer die Schneeschüeli aber no chli uffetreit mit de neu erlernte Technik (uf e Stock Fädle und über d Schultere lege). Bim Steisee hämmer uns denn parat gmacht. S isch ebbe doch nid nume eifach, hämmer festgstellt, so Schneeschue z bediene. So viel Schnalle und Rieme und denn gitzs no Links und Rächt… Die meiste häns bemerkt, aber für die wo i de Schuel en Fänsterplatz kah hän: die letzte beide Sätz sin sarkastisch gmeint gsi. Mir hän peinlich lang brucht, bis mir ändlich alli d Schue a de Füess kah hän ?
Nacher simmer am Chööbärgli verbih uf e Steinegletscher. Oberhalb vom steilste stück hets afo Rägne. Mir hän unseri wasserdichte Unterhoose ahglegt und sin in zwei Seilschafte tapfer witergange (han schliesslich au kei grossi Alternative kah). E Halbstund vor de Hütte hets denn au no ahgfange gwittere und mir hän de Donner vo allne Himmelsrichtige ghört. Saumässig ungmüetlich aber irgendwie au schön. Ich ha e Ecke ab, richtig, aber s isch scho es Erläbnis gsi. Mir sin alli bis uf d Unterhose nass gsi, hän chalt kah, s het gschneit und grägnet und de Nils het sin Cliffbar welle. Aber irgendwie isch es au eifach en epische Moment, wenn de mit dine Lüt uf em Gletscher laufsch (ok, d Schneeschue hän d Epicness chli usegnoh), ahgseilt bisch und d Natur ihri Macht mit em Wätter zeigt. Schlussändlich simmer pitschnass aber sicher in de Tierberglihütte ahcho.
D Usbildig hämmer nach em Lunch im Grupperuum gmacht. Do hämmer zerst Seilverchürzig ahgluegt, denn de Fläschezug güebt, de Kanadischi Fläschezuug (alias Retter in mancher Situation) und de Halbmastwurf bezw. de Mastwurf eihändig in Karabiner ihhänge glernt. Bi de letzte Disziplin hän de Gurti und de Gabi e genials Bild abgeh. Kläglich am schitere die beide. E guete Regisseur hät en Film drus gmacht mit em Titel „zwei Dubble und drei Karabiner“. Sclussändlich hän sis aber denn glich gschafft. Au d Gardabrämsi hän alli früener oder spöter im Griff kah. Nach em feine Znacht hämmer zwei Chartespiili gspiilt. Wie immer hämmer e gueti Rundi kah. Nach zwei Niederlage vom Jan simmer au go schlofe.
Am nächste Morge simmer scho früeh uf und in 3 Seilschafte wider talwärts gloffe. Unterwägs hämmer die neu erworbene Fertigkeite uf Prob gstellt. Zerst hämmer aber no d T-Schlitz-Verankerig müesse lerne. Die einte, häns vo Ahfang ah im Griff kah (Siebesieche hald), aber au die andere händs bim 2. Ahlauf so sicher gmacht, dasses drei jungi, starki, guetussehendi Bursche nid gschaft hän, de Pickel us em Schnee z zieh. Denoch hets d Hauptprob geh. Jede het müesse de Abhang chli abeseckle und ins Seil springe, während die Andere ihn us dere simulierte Felsspalte gretted hän. De Jan het das spitzemässig gmacht mit uns. S isch voll relaistisch duregführt worde, sodass wenn me z.B. öppis nid debi kah het, denn het me müesse improvisiere. Wie gseit: Kanadischi Fläschezuug; Retter in mancher Situation. Mängisch au mehr als eimol ?
Wo mir mit dem fertig gsi sin, het de Niels no sis Zmittag köcherlet und mir si witergange. Amene Felsblock hämmer no de letzti Stop gmacht und de Sälbstufstig güebt. Au do wider, realistisch als wärs im Ärnstfall. Me het was me debi he het, was me gheie lost isch in dr Gletscherspalte. Sogar Lawine hämmer Simuliert.
Und denn simmer scho wider zu de Autos gange.
Öppis muesi no verzelle. Mir hän alli e knallrote Chopf kah. Ja, die Stund bi de Usbildig wo d Sunne cho isch het uns schön verbrennt. Dorum, und zum unseri Menschlichkeit nach dere Schneeschuewanderig zrugg z erlange, sin mir uf em Heiwäg no in Lungeresee ghüpft. Mir hän eigentlich numme welle churz ine und wider use. Aber denn isch e Familie mit chline Chinder verbi cho. Und mir hän natürlich nume d Militärbadhose ah kah. So isch es cho, dass mir im chalte wasser bliibe sin, de Vatter vo däre Famillie schadefroh grinst het und mir hän müesse warte, bis die ändlich witergloffe sin.
Mit em Zitat vom Jan möcht ich de Bricht beände:
„Nächstmol müen eifach wider Fraue mitcho. Eifach em Niveau z lieb.“
Bilder
