Ä Gantrischtrilogie vom Feinste
Bi zwifelhaftem Wetter sin mir am Samstagmorge ins Gantrischgebiet gfahre.
Em Niggi si Plan isch e Rundtour über de Birehubel, de Ochse und d Bürgle ab dr untere Gantrischhütte gsi. De ersti Ufstieg ufe Birehubel und vor allem die folgendi Abfahrt het uns aber wenig Alass zur Hoffnig gä. Abgseh vom früsche Wind hen mir au no mit abblosene Häng und steihartem Schnee kämpft. Gwüssi vo uns hen au no Angst gha um diä schöne neue Ski.
Bim zweite Ufstieg Richtig Ochse het sich aber s Wetter afo bessere und d Sunne het agfange duredrucke.
Wenns viel abbloseni Häng git, denn muss es de Schnee au neume aneblose ha. Lut em Niggi sinere Logik muess me also nur die richtige Häng sueche. Und nachdem mir uf em Ochse aglangt sin, hen mir au so en Hang gfunde, sodass mir e ersti super Abfahrt hen könne gniesse.
Schliesslich hen mir bi strahlend blauem Himmel au no de letzti Ufstieg uf de Bürgle in Agriff gno. Uf dr Bürgle hen mir denn die Qual der Wahl gha, welles vo allne verlockende Couloirs mir hen welle abefahre. Nachere letzte traumhafte Abfahrt durch s Ostcouli, sin mir denn alli müed aber zfriede bim Parkplatz acho.
E grosses Danke an Niggi fürs Organisiere vo dere super Tour!
Tourenleiter: Niggi Isenegger
Teilnehmer: Sebastian, Noelle, Miriam, Cedric, Rory
Tourenbericht: Sebastian Kegreiss
Fotos: Niggi Isenegger
