Zum Skitourelager 2022 gits wie immer e Tourebricht wo zu unserer JO passt: knackig und mit viel Stil…
Samstig
Wär z Basel pünktlich am 5i ufem Zug will si,
dä dreit zur Not e halb Stund sini Ski.
Die churz Zugfahrt isch drum prägt vom Klage,
aber do müsse mr nid länger drah umme nage.
Denn mr hend scho no anderi Sorge übrig,
Isch denn in Bourg-St-Pierre no Schnee fürig?
Doch all’s vo dem isch unbegründet:
Denn merket euch: wer sucht der findet!
Dank em Christoph hend mr au nach Niederschlagsfreier Zit,
e gueti Tour und au d Abfahrt isch dr Hit!
Sunntig
Nach me lange und chli müehsame Tschumpel,
Träffe mr en St. Galler und sin Kumpel.
Während d’Walliser wüsse, wo sie ihres Auto münd lo stoh,
Hend die zwei e super Idee becho!
S Resultat isch gsi – wär hets dänkt:
Sie hend ihres Auto im Schnee versänkt.
Dank unserer JO (wie heldehaft),
hend sie’s aber wieder usegschaft.
Am Endi sind mr glich no ufe Gipfel cho,
aber zerst hend mr no e Lektion becho.
Mit me Lächle aber erhobenem Zeigefinger,
seit uns ein: «Ich habe gesehen… die Steighilfe macht’s nur schlimmer!».
Nach dem Vortrag het er uns lo stoh,
und mir hend denkt: denn mach’s halt nid, mir möches scho!
Mentig
Für e guete Wuchestart do bruchts nur eis,
nachem gmüetlich Brunch e Türli – und zwar es Chleis.
Doch chum hend mr unses erste Ziel vor Auge, chunnt er wieder dr Elan.
Und es rüeft im Chor: Mr wend no witer ufe Petit Vélan!
Und so wills denn unse JO Geist,
alli bisse dure, au die chleinst.
Unse Guide luegt guet, dass kein e Abflug macht,
So hend mrs denn au alli ufe Gipfel gschaft.
Doch leider hend mr nümme so viel Zit,
sunst nimmt uns dr Bus denn nümme mit!
Zistig
Das Couloir wo mr vo witem gseh hend isch nid vergässä,
Drum heissts für hüt Höhemeter frässä!
Nach 700 Höhemeter hend mr fangs dr Wald im Rugge,
Aber dört obe isch sie «scho..» die Lugge!
Es git für alli e meh oder weniger steile Ritt,
Aber mir sind uns einig, de Tag de isch dr Hit!
D Abfahrt isch prägt vo Pulver, Sulz aber au Stei,
Drum freue mr uns am Endi doch no ufs Dehei.
Am Obe sind mr denn alli gotte froh,
Hend mr zur Stärkig wieder e guets Znacht becho!
Mittwuch
Am Mittwuch isch sogar dr fittischt Joggel uf dr Schnure,
drum chunnt e «gmüetlicheri» Tour au bi unsrer JO dure.
Mr wend aber scho e gueti Abfahrt ha,
Drum ab zum Bonhomme, dem guete Maa!
Vo gest merke alli die müede Bei,
Drum gits zerst e «Gipfel-Schlof» ufem warme Stei.
Doch chli Action hätte mr denn glich no gärn,
drum blibt nur eis übrig: ab in d Häng!
Es goht los in d Abfahrt gege Norde,
aber möchet euch bitte keini Sorge!
S Bulletin isch guet und dr Pulver weich,
unsi JO (oder mindestens dr Bergfüehrer) macht kei Seich!
Dunstig
Es isch scho dr sechsti Tag vo dr Lagerwuche,
Drum isch nümm viel los mit uferuäche.
Doch es passiert doch no im steile Gipfelhang,
Dört chömme mr mit Spure nomoll voll in Gang.
D Sunne brötlet und mr gniesse die warmi Gipfel Pause,
bevor mr eimol meh dr Hang ab sause.
Dr eint vo dr Gruppe – dr konstant Übermotiviert,
schaffts, dass er in dr Felswand sin Stockteller verliert.
Uns überraschts nid und glich isch er muff, wo er das gseht,
kei Wunder, dass er jetzt bim Usestöckle nid die beste Charte het.
Fritig
Hüt wärs eigentlich wieder uf in Richtig Pass,
aber bi dem Wätter macht’s dört kei Spass.
Es isch düster dusse und me gseht dr Wind s Tal ab föhne,
Do vermisst mes jetzt scho, sich ufem Gipfel in dr Sunne z fröne…
Also düend mir uns mit me simplere Ziel begnüege,
und fönge ah, uns gege dr Wind dr Hang uf z pflüege.
S Gipfelchrütz hend mr aber nid so chönne gniesse,
Versuecht uns doch de Sturm vo de Füess weg z risse.
Also gönge mr witer wie mr ahcho sind,
und entferne d Fell erst hinterem Hügel, aber au das nur gschwind.
Samstig
Au hüt hend mr nid so Wätter Glück,
Drum ziehnd mr witer uf St-Luc.
E letschti wunderschöni Tour hets geh,
Es git halt nüt schnönners, als zum Schluss nomoll e Couli vo obe z gseh!
Leider müsse mr grad wieder ufe Bus, wo mr dunde si,
Will hüt wäri zu gern als Abschied no chli in Apreski…!
E Lager mit super Esse, Gsellschaft und so schöne Toure,
Dem dueni fast chli noche truure.
Drum freu mi ufe negsti Spass im Schnee,
Und natürli au euch alli wieder z gseh!
Impressionen
