Lueg i ha Lust uf vieles aber nid uf das
Nei, i heiss nid Nemo und kenne kei Mass
Drum machi was ich will und schriebe kei Bricht
Will ich mach Poesi und schrib es Touregedicht
Träffpunkt isch Liestel, Morge am 6i
E Wunder dass ziitig alli vor Ort si
Mir hän uns teilt in verschideni Gruppe
Und kehre de Heimat für drei Täg de Rucke
Mit Büssli und Autos, insgesamt drei
Fahre mir ins Tessin, nid convoy
D Noelle navigiert de Partibus, do simmer froh
Doch sie fahrt uf Bellinzona statt uf Lugano
Vom Campingplatz griege mir vo ahfang ah z ghöre
Jugendgruppe wänn si nid, die würde störe
Drum düen mir uns ermahne, schreie und lut sih goht garnid
Si wärfe uns vom Camping, s gäbi kei Verwarnig
Eine mues me no speziell erwähne
Er lueg zur Wösch us als hätt er Migräne
Physisch bi uns, doch teilnahmslos
Jagt er sine Gedanke noch
Und wecksch en us sinere Abwäseheit
Seit er, „sorry ha nid zueglost, was hesch gseit?“
Um s Ässe müemer uns au nid sorge
De Sevi kocht fein und de Mario duet Gipfeli bsorge
So guet versorgt bruchts au kei Selecta
De JO-Wahlspruch „In dubio pro linea recta“
Bim choche het er sich nid verbrennt
Aber defür öppis im Rucke verklemmt
De zertifizierti Masseur druckt jetzt drih
In Rucke vom Häuptling Mimimi
Apropos Indianer: mir müen drüber rede
E Hängematteverankerig die mues hebe
Und mir sin jo fridfertig unterwägs
Drum fälle mir de Marterpfahl uf unserem Platz
Plötzlich isch es Ärdbebe cho
Me chönt meine, ihn het de Muet verloh
D chnü hän gschlottered, gschwitzt het de Bolle
Zum Glück isch er nid us de Route gfalle
Statt ins Klättere isch de Tim denn in Zen Kurs gange
Bi däre Geduld chönnt er Gäld verlange
Aber au d Lea mues me a däre Stell lobe
Hartnäckig trotz si e Stündli dört obe
Ebefalls am strugle isch d Flora in de Wand
Eigentlich griegt si Support aller Hand
Doch zwüsche Flora und Fauna & siebe Stimme
Isch es schwierig d Hilf zwüsche all däne Witzlirisser z finde
Am Samstig isch denn au d Sunne cho grüesse
Und mir hän unseri Mehrseillängene dörfe gniesse
Am Obe het uns de Sebi veloh
Und mit sim Abgang isch aus s schlächte Wätter cho.
I weis nid was gits no z brichte?
Ich weis nümm meh über s Chlättere z dichte
Doch mir hän so mängi Routene gmacht
Sin go chlättere bis tief in d Nacht
Jo guet, das mit de Nacht isch chli übertribe
Mir wänn jo bi de Wohrheit blibe
Und glich isch s wohr, so lang wie mir het’s niemer usghalte
Und au nid de Räge cha uns vom chlättere abhalte
Mensche chame grob ihteile in zwei Gruppe
Die wo lang ufblibe, und die wo früeh usrucke
Und denn no die wo früeh ufstönd und trotsdem finde
Si bruche kei Schlof und als letzts im Zält verschwinde
Chnü ahzie und ine in Chare
Und zämmekuscheled uf Basel fahre
Mit gueter Gmeinschaft und Karaoke singe
Lönn mir jetzt das Lager usklinge
Und alli wo s läse und glich nüt kapiere
Möcht ich ermuntere und motiviere
Die Ahwäsende z löchere und Froge z stelle
Mir sin gern parat vo Ponte Brolla z verzelle
In gueter Erinnerig an das geniale Lager mit em Sevi, de Noëlle, em Mario, de Lea, de Flora, em Sebi, em Tim und em Gabi
Bilder
