E Tour mit em Mario, notürli meh fahre als ufstiege. Also gstarted hed das so; mir und au alli andere Flachland-Touris wo der schön Taag hei welle nütze, sind uf d Frutt gondelet. Obe hei denn mir aber agfählt und denn ischs au ganz gmüetlich losgange. Zwar nid viil ufe, derfür wiit hindere.
Do noni alli s LVS beüebt hei, heds notürli no Platz gha für e churzi Usbildig. Gschwind eis noime vergrabt, heds chöne losgoh. Ein Griff und die Sucherei beginnt, nach bitz schuufle hei mirs denn zum Glück wider gfunde. Und zügig isch witer gange.
Abgheiti Fähli sind wieder professionell Taped worde und so si alli Zwüschefäll au keini Problem gsi. Mit der Zyt ischs denn doch au no ufe gange, suscht chame jo nid abefahre.
Uf em Grat hei mir d Abfahrt gspottet, aber der Gipfel hed doch no müese bsuecht werde. Mit ganz viil andere wo die Idee gha hei, hei mir denn no z Fuess der Gipfel erklumme und der Blick uf Engelberg gnosse. Nach emene gmüetliche Zmittag hed denn aber d Abfahrt gruefe.
Also los, obe top Schnee, und dure Wald relativ Spassig. D sorge vom Morge, dass d Abfahrt z weni Beschneit isch, sind zum glück nid rlevant gsi. Bis ganz ins Taal isch guet, oder zmindescht fahrbar gsi.
Wie immer, e top organisierti und gmüetlichi Tour gsi und notürli au bizi Spassig.
