JO-Skitourenlager 2020

Samstig
Am 22. Februar simer em Befehl vom Tourenleiter Jan Ermuth (Sertiger Riese) gfolgt, wo eus gruefe hed: „Ich treff euch im Sertig“. Scho uf der Areis hämer es Gaudi gha. Womer denn im Walserhuus acho sind, isch dr Jan scho ready gsi und s hed ihn scho in de Bei küzelet. Schnäll hämer denn au müesse agfällt ha. Unsri erschti gmeinsami Tour hed uns nachme kurze, spontane Planwäxel ufs Wuosthorn verschlage. Binere super Pulverabfahrt, für einigi vo eus die erschti Läbenserfahrig, hed der Old-Shredderhand Nicolas sim Name alli Ehr gmacht. Am Schluss womer alli unde am Hang gstande sind, seit der Jan voller Stolz: „Dä Hang isch verbi!“ Das hämer grad as Wuchemotto ufgno, keini Häng bliibe do unversehrt. Zobe hämer im Häxähüsli dörfä ässä; ums freie Füür heds es feins Fondue geh. S isch nümm lang gange und mir hei eus in eusi Schublade gleit (e dreistöckigs, quitschigs Bett), aber zum schlofä längt das längschtens.
Dr Luxus hämer denn jewils am Morge dörfe gniesse: es Zmorge wie im Himmel, do isch mä gstärkt für die ganzi Tour.

Sunntig
Am negschtä Taag hämer denn au usegfunde, was Wätter und Verhältniss chönne biete. So hämer au glehrt, in schwirige Verhältniss klar z’cho. E stolligä Ufstig hed eus ufd Bergüner Furgga brocht, womer denn au e nassi Abfahrt gha händ. Dä Schnee hed eifach nach ämänä Schneemaa gruefä, so hed das au moll wider müesse si.

Mentig
Doch s’Wätter hed sich denn au no vo der schöne Site zeigt und so hämer denn ä schöni Tour bi tollem Schnee ufs Älplihorn chönne mache. Will der Fokus meh uf d’Abfahrte as uf d’Ufstig gleit worde isch, hämer au e super Abfahrt uf Monstein chönne gniesse.

Zistig
Do mir jo mit verschiedene Verhältniss müesse chönne klarcho, heds Wätter e harti Schneedecki für eus parat gha. Bi dene Umständ simer no froh gsi um unsri Harschiise.
Jetzt hämer eus moll so richtig im Spuräleggä chöne versueche, e Anarchie isch usbroche und s hed usgsee wie e wildi Härdä.

Dr Straightline-Günter Philipp isch denn hald so zu sim Name cho, wo die zweiti Stiighilf im Couli scho fascht z knapp worde isch. Die wichtigschti Lektion in dä Bärgä hämer imene steile Hang müesse lehre: „Alti Bärgler chönne öpis, und zwar umcherä“, hed eusä Bärgfüehrer Christoph eus gseit. Mit ämänä chli flauä Gfühl im Maage simer denn uf däm Schnee abegfahre, Massage für d’Bei und Qual für d’Ohre. Im Hotel hed eus denn e Überraschig erwartet; mir hei der Wirlpool dörfe gniesse.

Mittwuch
Für dä Taag hed dr Wätterbricht schön vorusgseit, so hämer eus ufs Gfroren Horn ufgmacht. S’Wätter hed denn aber gwächslet und Wind isch ufcho. Uf em Graat ischs denn scho chli ungmüetlich worde. Wiissi Nase händ uns denn au zum umcherä zwunge, doch au blind im Schneesturm hämer de schön früschi Schnee chli chönne gspüre.

Dunstig
Witer ischs denn in Davos gange womer ufs Chummerhüreli ufgstige si. Der afänglichi Suuneschiin hed wieder tosche und s hed denn doch zuegmacht. Zum Glück hämer dureghalte, was denn au mit ärä hammer Pulverabfahrt belohnt worde isch. So schön, dass mir nachere churze Pause nomol agfällt hei zum witeri Tiefemeter chönne z mache. Und dank em Jan sinärä Erfahrig hämer au dört die schönschte Häng mit gringschtem Ufwand chöne befahre.

Fritig
D’Schneefäll vo de Vortäg hei denn au am negschte Taag für schönä Puuder gsorgd. Mir si ufs Chörbsch Horn ufgstiigä, das hämer denn sogar bim Suuneschiin, wo eus am Nomitag erwarted hed, chönne befahre. Im Wald hämer dank em Telephonjoker erneut churz dörfä afällä und e ändlosgeili Abfahrt chönne gniesse. D Wuche isch denn im Hexehüsli mitmne Chees- und Schoggi-Fondue abgrundet worde.

Samstig
Do mä jo der Heireisetaag nid nume will verplämperlä, simer zum Abschluss no ufd Tällifurga ufgstige, um denn ins Dischmataal, mit em bald scho verföntä Pulver abe zfahre und denn vo dört us hei z’reise.

Die ganzi Wuche hämer ä super Stimmig gha, kei Wunder bi denä Lüt. Kulinarisch verwöhnt simer au worde, gewaltig was do ämä uftischt worde isch.
Danke an Jan wo do ä ganz professionelli Leitig gmacht hed, rollendi Panik funktioniert hald ämä doch am beschtä. Mit em Christoph hämer au e super Begleitig gha, wo uns vill hed chöne zeigä und eus au moll uf ungmüetlichi Spure higwise hed.

Churz, es ischs e sehr lehrrichi, abwächligsrichi und vill z churzi Wuche gsi! 🙂

Bilder