Titlisrundtour mit Grassen
„Samstig morge 6.15 Uhr isch Abfahrt!“ Mir hend zwar alli scho länger gschlofe vor ere Skitour, aber wahrschinli seit das dr Niggi nid grundlos. Also träffe mir uns zu fünft, pünktlich und wie immer top motiviert z Liestel am Bahnhof. Mir freue uns bsunders ufe Neuschnee, wos gester extra für unsi Tour geh het. Uf dr Hifahrt nutze die eint oder andere d Zit no für es Pfusipfüsli und so gohts nid lang, bis mir ufem bereits guet bsuechte Parkplatz vo dr Talstation ahchömme.
Wo mir die ganze Lüt gsehnd, wüsse mr alli, dass es e guete Entscheid gsi isch so früeh z goh. Also verliere mr kei Zit, packe unsi Sache und stönde ah. Es beruhigendes Gfühl weme fast ganz z vorderst isch! Jetzt hend mr au no chli Zit zum dr Skihelm und s Gstältli montiere.
Obe acho gsehnd mr schnell: das wird e geile Tag! Perfekti bedingige mit Sunneschiin überem Näbelmeer.
Die ersti Abfahrt isch scho recht verspurt und mr froge uns, wie viel scho ufem Grot zum Vordere Titlisjoch si. Wo mr d Traverse hinter uns hend, gsehnd mr aber: mir sind die erste! …aber nümm lang, will hinter uns chömme scho die nägste Gruppene…
Nachem wunderschöne, usgsetzte Grötli mache mr uns ans Abseile. Während’s es paar hinter uns gmüetlich nämme, fange die eint oder ander ah, chli unruhig z wärde ab dere „langsame JO“.
Jä, bi dr erste Abseilstell hät me sicher no chönne Zit usehole.. aber mr chönne jo au nüt defür wenn sie nid gnue früeh ufstöhnd..;)
Bi dr zweite Abseilstell wird denn d Technik optimiert und es goht zügig vora. Nach dem Gerutsche in de schneegladene Coulis isch s grösst Abentür vo dr Tour aber scho verbi und mr möche uns an Ufstig.
Dr Niggi spurt solid dr ersti Steilhang ufe. Nach dere Büez werde mr scho vo de erste überholt. Jä sie sind scho schneller, aber sie hend definitiv es Lineal verschluckt: Mir laufe also in ihrer Spur uf ere grade Linie bis unter s Grassebivak. Drei vo uns sind zwar vom Skitourelager nur die schönste Ufstiegsspure gwöhnt, aber mit de Stighilfe goht das scho.
Für die letschte dreihundert Höhemeter ufe Grasse dörfe mir denn aber e vernünftigi Spur gniesse. Dobe ahcho gits no es paar Föteli und mir freue uns scho uf d Abfahrt im Pulverschnee.
Die isch denn au tatsächlich dr Hammer gsi: Voller Freud hend mir uns in Hang gstürzt und dr Schnee het in alli Richtige gstübt. Genial!
Witer unde hend mr vom Niggi sinere Ortskenntniss profitiert und unseri Spure in unberüehrti Häng dörfe zieh. Nach es paar holprige Passage und chli Waldwägli fahre, isch denn dr Spass aber scho verbi gsi.
Zrug im Tal sind mr bi dr Fürenalp Bahn ufe Bus und zrug zum Parkplatz.
Dört hend mr uns gli wieder ufe Heiweg gmacht is Baselbiet.
Wieder
Im Auto sind mr zwar müed, aber super zfride gsi mit dere tolle Tour – und somit es grosses Danke an Niggi!